Waar is jy?

Ons vra so baie vrae vir God…  Hoekom het dit gebeur en wat daarvan.  Het ons al daaraan gedink dat God in sy woord baie vir mense, vir ons, vrae vra.  Vrae soos:  Wie is jy?  Waar is jy?  Wil jy gesond word?  Wat is jou naam?  Waarheen is jy oppad?

Ek wil bietjie met jou praat oor een van God se vrae…  Waar is jy?  Genesis 3:9 (AFR1983)  9Maar die Here God het na die mens geroep en vir hom gevra: “Waar is jy?”

Jy ken mos die verhaal al van kleins af.  God het die mens gemaak en hulle in die Paradys geplaas.  “Van al die bome in die tuin mag julle eet het Hy gesê; maar van die boom van kennis van goed en kwaad mag julle nie eet nie.  As julle daarvan eet sal julle sekerlik sterwe…”   Die mens het toe daarvan geëet.  Toe kruip hulle weg.  en God kom soek hulle.  Waar is jy? vra Hy…

Toe ons klein was het ons vir ons ouers weggekruip in ‘n kas of tussen die klere in ‘n winkel.  Die lekkerste was as jou ma of pa roep; “Waar is jy?”  Dan weet jy jy word gemis, jy weet iemand gee genoeg om, iemand mis jou.  Ek wil hierdie afleiding hier ook maak.  God het sy kinders gemis, Hy soek hulle.  Dis nou nie eintlik asof Hy nie geweet het wat aangaan nie.  Ek meen as hy alwetend en alomteenwoordig is dan het Hy mos presies geweet wat aangaan.  Hy vra “Waar is jy?” want, Hy gee om.  En so kan ons maar gaan kyk regdeur die Bybel, soek God altyd na ons.  Hy gebruik vrae om vir ons te wys Hy soek gesprek, ‘n verhouding met ons.  Dink maar aan Job, God vra vir Hom , “Job wie het die Seekoei en die Volstruis en die Krokodil gemaak, wie is in beheer.  Goeie vraag né!  “Wie is in beheer?”

God soek ons.  Jesus vertel van die een skaap wat weg is en toe los die wagter die nege en negentig en gaan soek die een.  Jesus vertel ook van die muntstuk wat weggeraak het en hoe die vrou soek en soek en soek tot totdat sy dit kry.  Sy soek nie net tot sy moeg raak, of tot die huis skoon is of tot sy besluit die muntstuk is nou maar weg nie.  Nee, sy soek tot sy dit kry.

Jy sien ek dink hierdie is baie belangrik.  Want, ons kruip weg.  Hoe gaan dit vra iemand?  Nee, baie goed dankie.  Maar jy jok want jy kruip weg agter die woorde.  Jou hart is seer maar jy wys dit nie, nie vir God nie, nie vir ander en ook nie eers vir jouself nie.  God se vraag is ‘n goeie, liefdevolle, omgee vraag.  en God vra hierdie vraag vandag vir my en vir jou.  Waar is jy?  Agter wat kruip jy weg?

En dan laastens.  God soek ons omdat Hy vir ons lief is en omgee.  Hy wil met ons in gesprek tree.  Hy wil ‘n verhouding met ons hê.  Dink maar aan die Gelykenis van die verlore seun.  Die Vader het elke dag gaan kyk of die seun nie aankom nie.  Sy hart het na die seun gesoek.  Toe hy nog sommer vêr aankom het sy pa hom al gesien en na hom gehardloop en hom omhels en die vetgemaake kalf geslag.

Goeters en dinge wat geld kos…

 

Die afgelope tyd het die diewe my gery.  Eers breek hulle by my huis in op die eerste aand dat ek weg is oorsee.  Hulle steel eers my seun se rekenaar en kom toe later die aand terug en steel my baie duur Padfiets.  Ek kom net terug van die Transpyr bergfiets wedren en op ons eerste aand in Koffiebaai steel hulle ons gemeente se bus.  Net terug van Koffiebaai en wraggies hulle kom by my vrou se werk in en steel haar rekenaar ook.  Hulle vat al my goed!  Sonder om te vra!  Hulle krap in my lewe!  Nou stoei ek met die versekering.  En dis regtig nie lekker nie!

Nou ja toe, genoeg gekla.  Ek hou daarvan om altyd te vra wat God my wil leer uit ‘n verleentheid.  Ek glo nie God reel nou dat alles gesteel word sodat hy my kan leer oor iets nie.  Steel is deel van die sondeval!  Daar was nie diewe in die Paradys nie…

Jy sien in hierdie hele proses van oor goed worry het ek baie oor Jesus se woorde gedink toe Hy gesê het ons moet nie skatte op aarde bymekaar maak nie, maar in die hemel.  Hoe meer ek worry oor als wat gesteel is en hoe ek dit gaan vervang en waarmee gaan ek nou ry en someer, hoe meer sukkel ek met my geestelike lewe. Dit maak dat ek sukkel om met die Here daaroor te praat.  Ek kom agter materialisme is my vyand.  Dit dryf my weg van God af.  Dit maak maak my kwaad.  Steel my vrede.  Maak my deurmekaar.

Here help my om te fokus op skatte in die hemel.  Wat is hierdie skatte in die hemel vra ek myself af?  Wel toe hulle ons bus op die Uitreik steel en ek vra hoe voel die groep daaroor was almal se reaksie (myne inkluis) kwaad wees en ‘n “as ek hulle net in die hande kan kry” emosies.  Maar oom Hennie ‘n afgetrede sendeling het gesê: “Kom ons bid en vra die Here om daai ouens wat die bus gesteel het te seën en om hulle te help om Hom regtig te leerken…”

Toe is ons stil!

Matteus 6:20 (AFR1983)  20Maak vir julle skatte in die hemel bymekaar, waar mot en roes dit nie verniel nie en waar diewe nie inbreek en dit steel nie.

Barcelona

Nou ja toe, wat sal ek sê van my week in Spanje? Wat ek kan sê; is dat hierdie plek regtig baie hoë berge het. (ek moes daaroor trap met my fiets). Die mense is vriendelik. Hulle eet brood en salami of parma ham. Ek het mos eintlik hiernatoe gekom om die Transpyr Gran Raid bergfiets wedren oor 7 dae te ry om geld in te samel vir ons Jeugfonds.
Eintlik wil ek nou oor iets anders praat. Vandag was ek alleen in Barcelona. Ek het twee “God moments” gehad. Die eerste was toe ek by die Barcelona Katedraal instap. Wel eintlik het ek na die Picasso museum gaan soek en toe strompel ek per ongeluk oor hierdie ongelooflike Katedraal. Ek weet eintlik niks van die plek af nie. Wil nog gaan oplees as ek weer ‘n Internet konneksie het. Die Katedraal moes honderde jare gevat het om te bou. Gewoonlik hou ek nie baie van Katedrale nie. Ek hou oor die algemeen nie van godsdiens nie, ek hou en is lief vir Jesus en God my Vader en die Heilige Gees.
Maar wat my nou eintlik oor hierdie Katedraal laat gesels is; ek het daar binne gestaan en na die ongelooflike gotiese dak gekyk wat jou oë hemelwaarts dwing. Die mense se respek vir die gebou “haal jou hoed af, sê die man by die deur,” en as ‘n vrou se skouers wys moet sy ‘n serp omsit. Wat het hierdie mense gedryf om hierdie asemrowende gebou te bou? Vra ek myself? Ek het so rondom my gekyk en wat ek gesien het was liefde en eerbied vir God my Heer. Elke skildery wys ‘n gesig wat in eerbied hemelwaarts staar. ‘n Gesig wat na Jesus aan die kruis staar. Hierdie gebou was mense se manier om vir God te sê “Ons is lief vir U! So lief dat ons geen moeite gaan ontsien nie. Ons gaan ons beste gee en vir U die mooiste Katedraal ooit bou.” Ek waardeer U ook my God, miskien is dit hoekom ek dit sien….

Die tweede ding wat gebeur het was my Taxi rit na die lughawe. Ek was net so op na die Transpyr dat ek nie kans gesien het om my fiets en bagasie op en af van die trein te tel nie. (al is dit nie eers ver nie). Wel die Taxi bestuurder is toe ‘n Indiese man. Hy vra my of mense in Suid Afrika Christene is. Ek sê ja. Ek sit voor langs hom en bid en vra my Vader om my iets te gee om vir hom te sê. Ek vra toe maar watter geloof hy is. Hy sê hy is ‘n Sjiek Hindoe. ( hoop ek het daai sjiek reg gespel). En toe kom dit; nog ‘n “God moment”. Avatar (ja soos die fliek en dis regtig sy naam) vra my wat ek doen vir ‘n lewe. Wel sê ek vir hom. Ek is ‘n “Priest”. Dit help nie ek sê vir hom eks ‘n dominee nie, hy het nie ‘n clue wat dit is nie. En daar kan ek toe vir hom sê “God loves you very much. He loves you so much that he sent his Son to die for you.” en ek sien hom glimlag en ek voel sy hart warm word en ek voel my hart warm word en ek weet God was nou net tasbaar hier!

20160621-075639.jpg

Waaroor het ek nou eintlik beheer?

20160609-153416.jpg

Nou ja toe, daar slaap ek toe nou gisteraand omtrent niks nie. Al waaraan ek kan dink is dat my fiets en bagasie te swaar en te groot gaan wees om op die vliegtuig te kom. Hulle sê mos nou baie mooi, jy mag net 30 kg vat op Emirates. En as jy jou bagasie se hoogte, breedte en lengte bymekaar plus mag dit nie meer as 300 cm. wees nie.
Myne weeg meer as dertig en is groter as 300 cm. Daar lê ek toe die hele nag deur en worry. Hoe sê die liedjie? “Don’t worry be happy…”. Dis maklik vir hom om te sê hy klink buitendien soos ‘n Rasta wat nie mooi verstaan van worry en fietsry en so aan nie. En dit terwyl ek my beauty sleep nodig het voor my groot tog in die Pyrenee berge.
Dis toe dat ek weer beleef hoe die Here op sy geduldige liefdevolle manier my weer herhinner aan ‘n ou waarheid. Fokus op dit wat jy kan verander en los die res vir God. Of soos Francis van Assisi gesê het: “Heer help my om te aanvaar wat ek nie kan verander nie. Om te verander wat ek kan en vir wysheid om die verskil te ken.”

In Handelinge 12 word die verhaal vertel van Petrus wat in die tronk is. Sy situasie is redelik benard. Hy word deur vier afdelings van vier soldate elk bewaak. Hy was verder met twee kettings geboei en by die deur was daar ook nog twee wagte.
Meteens staan daar ‘n Engel in die tronksel. Net so terloops die tronksel was eintlik maar net ‘n gat in ‘n rots met strooi op die vloer en ‘n emmer in die hoek. Daar skyn ‘n helder lig in die sel. Skielik val die kettings van sy hande af en die engel sê vir hom hy moet opstaan en agter hom aanloop. Die deure en hekke van die tronk het oopgegaan. Petrus het hom in die straat buite bevind en die Engel het verdwyn.

Ek sien in hierdie verhaal dat daar dinge was waaroor Petrus beheer gehad het en dinge waaroor hy geen beheer gehad het nie. Hy kon niks doen aan die kettings waarmee hy geboei was of die deure wat gesluit was nie. Maar toe die kettings afval moes hy self opstaan en agter die Engel aanloop. Die deure het oopgegaan. Buite in die straat het die Engel hom verlaat en moes hy self besluit: waar gaan ek nou heen?

Jy sien, dit wat Petrus self kon doen moes hy doen, maar dit wat hy nie self kon doen nie, het God vir hom gedoen…

Dit bring my terug by my slapelose nag. Ek het gelê en worry oor goed waaroor ek geen beheer het nie. Dom né? Hier sit ek nou by die lughawe en alles is ingeboek en fine. Is God nie goed nie? Ja Hy is? Daar sien ek dit toe nou weer.

“…nou besef ek eers regtig dat die Here sy engel gestuur het om my uit die hande van Herodus te red…”

20160609-153431.jpg

Pyrenees Berge hier kom ek….

20160608-123948.jpg

Wel hier gaan ek, more klim ek op die vliegtuig en ontdek die wereld soos Jannie du Toit sing. My vrou se baie vir my ek is die Here se witbroodjie en ek begin haar nou al te glo. Dankie Here vir hierdie geleentheid. Ek het die behoefte om hier die storie te vertel ( het dit al in die kerk vertel).
Wel dit het gekom met een van ons lidmate Louis Holtzhausen wat gevra het ek moet sy seun en sy vrou, so n bietjie vir n mountain bike ride vat, as hulle hier kom vakansie hou uit Switserland.
Wel ek het dit toe gedoen en dadelik het ek en Frans en sy Duitse vrou Dajana geclick. Die gesprek het by alles gedraai en ook onder andere oor die werk van die Here en die fonds insamelings projekte wat ek aanpak. Ek het toe aan hulle vertel van die keer wat ek van Pretoria na Mosselbaai gery het, die ander keer van Paternoster na Port Shepstone, die Epic, die Otter en my 300 km. tog van Kaap Agulhas na Mosselbaai. Elke keer het ek geld ingesamel vir die een of ander projek in die Koninkryk. Dajana het veral baie belang gestel in die gesprek en dadelik vir Frans gese ek en hy moet iets saam doen. Wel dit toe maar daar gelaat en na ‘n lekker ete by Eight Bells Hotel is ons huistoe.
Maar Frans het kontak gehou. Die Here het met hom begin werk….
Eendag kry ek toe ‘n mail wat se hy wat Frans is wil graag betrokke raak by so ‘n projek. Hy sal sien wat hy kan doen daar in Switserland. Wel soos die spreekwoord se: “the rest is history”. Ons het meer as R140 000 saam ingesamel vir werk onder die Jeug in ons gemeente. En ons gaan die Transpyrees bergfietswedren in Spanje ry as fondsinsamling projek. Wat kan ek se? Die ding het groter as ek geraak en Frans werk nou net so hard in die Koninkryk soos ek. Sondag begin ons met ons 7 dae tog oor die Pyrenee berge.

Hier is wat die website se:
ADVENTURE 2016> 7 Stages > 775km > 20.600m of accumulated
climbing

STAGES TRANSPYR 2016:

– Stage 01: 12 junio, ROSES > CAMPRODON (120km, 2.500m pos. – 1.245m neg.)
– Stage 02: 13 junio, CAMPRODON > LA SEU D´URGELL (115km. 2.600m pos. – 2.535m neg.)
– Stage 03: 14 junio, LA SEU D´URGELL > EL PONT DE SUERT (120km, 3.500m pos. – 2.885m neg.)
– Stage 04: 15 junio, EL PONT DE SUERT > AINSA (95km, 3.400m pos. – 3.540m neg.)
– Stage 05: 16 junio, AINSA > JACA (95km, 2.900m pos. – 2.315m neg.)
– Stage 06: 17 junio, JACA > BURGUETE / RONCESVALLES (135km, 3.200m pos. – 2.740m neg.)
– Stage 07: 18 junio, RONCESVALLES > HONDARRIBIA (95km, 2.500m pos. – 3110m neg.)

Ek sien die saak so. Fondsinsameling gaan oor meer as rand en sent en fietswiele wat sing en twee ouens wat doen waarvoor hulle lief is. Fondsinsameling gaan daaroor dat mense betrokke raak in die Koninkryk van God en op hierdie manier ongekende seen beleef. Mag die naam van God drie Enig alleen die eer kry!!!!

“Ek wil die Here loof en nie een van sy weldade vergeet nie.”. Psalm 103:2

20160608-122909.jpg

Sien Jesus ons…

Nog steeds op die onderwerp van gee.
Lukas 12:1-3 vertel die verhaal van Jesus wat staan en kyk hoe mense geld in die Tempel se offergawe kis gooi. Daar kom toe ‘n arm weduwee en gooi baie min geld in. Maar dit was alles wat sy gehad het. Jesus het haar gawe hoog geag, selfs hoër as die rykes se klomp geld.
Wel jy sien die verhaal het my aan die dink gesit… Hou Jesus ons dop? Sien Hy wat ons gee? Of nie gee nie? Hy het dan daar by die Tempel gestaan en kyk…  (ek verstaan dis nie eintlik die sentrale boodskap nie, ma ek wonder toe…)

Ek gaan my eie vraag probeer beantwoord. Die een of ander Kerkvader; dink dit was Calvyn het gesê: ons gee met afgekapte hande. Jesaja 62:6 sê; ons beste dade is soos vuil klere. Wat kan ons vir God gee.
Ek dink gee is aanbidding – “Worship.” As jy gee is dit ‘n manier om God te aanbid. En as ons God aanbid dan bring ons eer na sy naam. Dit gaan alles dus oor God, net oor God. Ons gee maar net wat hy alreeds vir ons gegee het. Gee is genade. Kyk maar na die arm weduwee; sy gooi in dieselfde kis geld terug waaruit sy tien teen een aalmoese kry…

Hou Jesus ons dop? Ja ek dink so, maar sy dophou is ‘n dophou van liefde, nie van oordeel. Elke gawe wat ons bring na Hom maak sy hart warm, dit wys sy liefde vir ons. Sy genade.

Luke 21:1–4 (AFR1983)
1Jesus het rondgekyk en die rykes hulle gawes in die offergawekis sien gooi.
2Hy sien toe ook ’n arm weduwee twee klein muntstukkies daar ingooi,
3en Hy sê: “Dit verseker Ek julle: Hierdie arm weduwee het meer ingegooi as al die ander.
4Hulle het almal iets uit hulle oorvloed in die offergawekis gegooi, maar sy het in haar gebrek alles ingegooi wat sy gehad het om van te lewe.”

 

Wat jy saai, sal jy maai…

As jy Karig saai sal jy karig oes en as jy volop saai sal jy volop oes sê die woord(2 Korintiërs 9:6).

So ‘n paar jaar gelede het ek die voorreg gehad om Israel te besoek, man dit was ‘n amazing experience. Ma ek wil nie nou eintlik daaroor praat nie, waaroor ek wil praat is die argument waarin ek daar betrokke geraak het met ‘n mede Christen. Die stryery het gegaan oor die gedeelte in die Bybel wat sê: wat jy saai sal jy maai. Die betrokke persoon het gesê dat as jy vir die Here gee dan gee Hy weer vir jou terug. “Sê nou maar;” sê hy vir my; “as jy R1 000 ‘saai’ dan sal die Here vir jou ‘n ‘oes’ gee van R10 000.” Ek het nie daarvan gehou nie, “ek dink dit werk bietjie anders” het ek gesê. Die persoon het verder gegaan en gesê dat iemand hom gevra het of hy van sy netto inkomste moet gee vir die werk van die Here, of van sy Bruto inkomste. Wel was die antwoord, “wil jy ‘netto’ geseën word, of wil jy ‘bruto’ geseën word?”
Ek sien die sakie heeltemal anders. Ek dink 2 Korintiërs 9:6 wil vir ons sê dat God ‘n oes sal oplewer as ons saai in sy Koninkryk. Kom ek noem ‘n voorbeeld. Jy gaan elke Vrydag by ‘n tannie in die ouetehuis tee drink. Oor tyd sien jy hoe die tannie na jou besoeke begin uitsien en jy en die tannie kry groot seën daaruit en God se naam kry die eer.
Nog ‘n voorbeeld: Jy werk baie hard in jou besigheid vir jare, oor tyd groei jou besigheid en raak jy suksesvol. Op hierdie manier is jy versorg en kan jy bydra tot God se Koninkryk.
Jy kan jou geestelike lewe seker op ‘n manier soos ‘n Boerdery sien. Stoot al jou saad in die land in (so by the way die saad kom alles van God af). Met ander woorde leef met passie vir die Here. Die Here sal ‘n groot oes laat opkom tot sy eer!

2 Korintiërs 9:10 (AFR1983)
God wat saad verskaf om te saai en brood om te eet, sal ook aan julle saad gee en dit laat groei en julle vrygewigheid ’n ryk oes laat oplewer.